მათემატიკისა და საბუნებისმეტყველო საგნების სწავლისა და სწავლების საერთაშორისო კვლევამ (TIMSS) დაასკვნა, რომ ზოგიერთ ქვეყანაში, მოსწავლეებს მათემატიკის შესასწავლად სულ უფრო ნაკლები დრო ეთმობათ.
20-წლიანი კვლევის შედეგად გამოვლინდა, რომ ზოგიერთი ქვეყანა დღეს მათემატიკის სწავლებაზე უფრო მეტ დროს ხარჯავს, ხოლო ზოგიერთი ქვეყანა – შედარებით ნაკლებს.
მაგალითად, ლიტვაში, მათემატიკას 21 წუთით ნაკლებს უთმობენ, იაპონიაში – 20 წუთით ნაკლებს. აშშ-ში კი, პირიქით, 49 წუთით მეტი ეთმობათ მოსწავლეებს მათემატიკისთვის, კანადაში – 20 წუთით მეტი.
კვლევის შედეგების მიხედვით, მოსწავლეთა უმეტესობა აღნიშნავს, რომ ჩვეულებრივ კარგად ართმევს თავს მათემატიკას. TIMSS-ის 20-წლიანმა ციკლმა აჩვენა, რომ მოსწავლეთა 17% არ ეთანხმება შემდეგ გამოთქმას: „მე, ჩეულებრივ, კარგად გამომდის მათემატიკა.
შეგახსენებთ, რომ საგანმანათლებლო მიღწევების საერთაშორისო ასოციაციის (IEA) ინიციატივით, TIMSS-ის კვლევა უკვე 20 წელია ტარდება და მსოფლიოში ყველაზე ფართომასშტაბიან საგანმანათლებლო კვლევად ითვლება. კვლევაში სხვადასხვა ქვეყნის 600 ათასზე მეტი მოსწავლე მონაწილეობს. კვლევის ფარგლებში ფასდება 9-10 და 13-14 წლის მოზარდების ცოდნა მათემატიკასა და საბუნებისმეტყველო საგნებში და იმ ფაქტორების კვლევა, რომლებიც გავლენას ახდენს მათემატიკისა და საბუნებისმეტყველო საგნების სწავლისა და სწავლების პროცესზე.
საქართველო მონაწილეობდა კვლევის სამ ციკლში – 2007, 2011 და 2015 წლებში. 2015 წელს TIMSS-ის კვლევაში 153 სკოლის 9000-ზე მეტი მოსწავლე იყო ჩართული. საქართველოში კვლევას „ათასწლეულის გამოწვევის ფონდი – საქართველოს“ (MCA) და „ათასწლეულის გამოწვევის კორპორაციის“ (MCC) მხარდაჭერით შეფასებისა და გამოცდების ეროვნული ცენტრი ახორციელებს. დეტალური ინფორმაცია კვლევის მიგნებების შესახებ რამდენიმე თვეში გამოქვეყნდება.